Matthes vertällt Alles hat seine Zeit

Matthes vertällt Alles hat seine Zeit

Matthes vertällt Alles hat seine Zeit

Dat wooer et — suo sät m’r en Krieewel, wenn jet am Eng on avjeluope es. Wooer et dat? - suo hedden dat letzde Stöckske van et Bibel-Projramm, wat die Krieewelsche Pappköpp bes letzde Mon’t op de Bühn jebreit häbbe. Äwer m’r wit jooe, nooe et Spieel es vür et Spieel. Be de Pappköpp es dat och suo. Een Weäk nooe dä letzde Vürhang op de Peter-Lauten-Strooet häbben sech die Krieewelsch-Platt-Experten für drei Daag nach Jut Schirmau vertrocke, für öm sech wier Mäuzkes für et nächste Projramm uttuklamüsere. Wenn et dann em November wier lossjieeht, häbben die Pappköpp et Jubiläum „Veärzig Jooehr Freud an Feäm“ vür de Bross. On dann wooer et dat noch lang net. Dofür sorje all die jöngere Pappköpp.

Dat wooer et — suo seit neulich Wolfgang Müller nooe dä letzde Mundartooevend be Jietz en Feschele. Schaad, nou hät hä opjehüert, möt sin Mundartmannschaft Jooehr für Jooehr die Feschelche möt Mäuzkes op Krieewelsch Platt tu ongerhalde. Dä Saal wooer jooe jedes Kiehr rappelvoll. Äwer, wie hit et doch: jedes Deng hät sinnen Tiet.

Wer en de letzde Jooehre net een van die skurile Herr-Winzen-Shows en et Stadttheater erlevvt hät, dä hät jet verpasst. Et wooer ömmer für tu jriene schüen, wenn dä Winzen möt sinne ruode Huusmantel aan, et Aquarium möt dä Joldfesch onger dän Ärm, en et Theater eröm leep on et Publikum an’t söcke wooer. Wenn hä dann endlich op de Bühn aanjekuome wooer, jooev et möt däm sin Showjeäs och ömmer jet tu lache. Äwer nou hät hä jeseit: dat wooer et.

Dat wooer et — suo hät och osser Eishockey-Ass Christian Ehrhoff nou jeseit. Hä wöer jooe jeär möt die Kölsche Hirringe noch ens Deutscher Meister jeworde. Äwer dooe häbben öm die Nürnberjer Mimmkätzkes en Steckske vür jestellt. Fiefondörtig Jooehr es wahl kin Alder, äwer möt son Karriere wie dä: 2003 Mieester möt dä KEV, dann üewer 800 Spieele en de NHL, on nou tuletzt noch de Selverije Medaille on als Fahnenträjer be de Olympiade - dooe kuos hä doch rouhig sägge: dat wooer et. Ech well doch hoffe, dä hät net verjeäte, dat hä be dä KEV jruot jeworde es. Die Pinguine küeßen et joot jebruke, dat hä sech he be os en Krieewel möt sin Erfahrung noch en bödche nützlich mäckt. Für dä Adduono häbben se jooe nou och jeseit: dat wooer et. Öm es öm. En däm sin irschde Jooehre als Trainer en Krieewel hät hä osser Kufencracks jooe prima nooe vüere jebreit. Äwer tuletzt hät jooe nix miehr jeklappt. Wie jeseit: alles hät sinnen Tiet.

Dat wooer et nou och möt die Buddelee en Jellep. Wat die dooe net alles jefongen häbbe en all die Jooehre. Dat mot nou alles irsch ens jerieet jemäckt on restauriert werde. Dooe häbben osser Archäologen für de nächste Jooehre satt on jenoch möt tu duon, bevüer dat et an angere Stelle möt dat Utjrave wierjieeht. Die Bataver häbben sech he en Krieewel en dä alden Tiet möt die Römer erömjeprüjelt on jejenseitig de Köpp enjeschlare. Dooevan hät m’r alleen üewer 300 duode Peärdes jefonge. Wat mäckt m’r nou bluoß möt all die Knöek on dä angere alde Krooem? Dat kann doch net alles en et Museum Lenn utjestellt werde. On die Urnen ut die Jräber van de Iesertiet, die se dooe jefongen häbbe, kuomen die dann demnächst be os en die Jraveskirk van et Kapuzinerkloster tu stooehn? Ens kieke — wir werden et jooe erleäwe.

Mehr von Westdeutsche Zeitung