Mundart Schon wieder Herbstferien

Mundart Schon wieder Herbstferien

Mundart Schon wieder Herbstferien

Ich weeß et nit, äwwer wenn m´r Kenger in de Schull hätt, jeht dat Jo´ehr noch flotter öm. Ko´em dat de Ferien am Äng sinn, jeht et alt widder loss. Etliche fleejen noch ens in de Sunne, oder lossen sich in Holland den Wenk um de Naas blo´esen. Mingen Mann haad kinnen Urlaub, äwwer dat wo´er nit schlimm. De Leo wo´er fruh, ens den janzen Daach spillen ze künnen. Tüscherdurch hannt m´r noch jet jerechnet, dometten dat nit in Verjessenheet jerööt. Uss Klaase spillt dis Jo´ehr dat Martinsstöck, drömswillen mo´eten m´r uch noch dem Leo singen Text lieren. Hä spillt den Vatter vam Martin. Nächste Wäche werden dann noch de Laternen jebastelt, dometten et dann uch lossjonn kann. Su hätt m´r dückes jet am Jang. Bej uss in de Schull steht de „Herbstbasar“ aan, do orjanisier ich mit. Dat dat vill Arbeet is, kann sich jo sicher jeder denken. Äwwer uch dat lohnt sich immer. Su hann ich uch nu noch en paa „Veranstaltungstipps“ fü´üch! Dä Basar is am 25. November in Berjisch Born in de Schull! Wä noch nit do wo´er: Et lohnt sich!

Dat de Leo uch mit singer Nele jespillt hätt, is klo´er. Dem Nele sing Tante häät uch am 25./26. en Adventsusstellung up dem „Rautenbacher Hof“, do wo et Nele wönnt. De zwej hannt en janzen Nommedaach jebastelt, dat wollen se do uch verkoofen. Uch dozo kann ich bluus saaren: Ich bin jespannt!

Am Sunndaach wo´eren m´r mit uss kölschen Früngden den janzen Daach im „Odysseum“ in Kölle. Dat is en Abenteuermuseum. Sess Stonden hannt m´r do drinnen ussjehaalen, un kinn Oorenblick wo´er langwielich, janz im Jejendeel! Äwwer ming Schochen hannt m´r donoh´ wieh jedonn.!! Dat Jestippel! Kenger künnen do allerhang ussprobieren, m´r muß also üwwerall mitmachen, öm su etliches ze verstonn. De Leo un et Anouk haaden den jrößten Spaß, im Flugsimulator , de Papas up de Rückbank üwwer Kölle „ze fleejen“, un o´ehn Bruchlandung, sicher ze landen. Dann is in dem Museum uch en Museum,van de Muus. Do kunnt m´r selver en Zeichentrickfilmchen driehen. Uch do hannt se lange römjekroost. Et Tina, ming Früngdin un ich, wussten dückes nit, wä mieh Spaß do draan haat: De Kenger, oder de Papas! Uch dat Museum kann ich allen mit , äwwer uch o´ehn Kenger, an et Hätz leejen.

Am Mo´endaach nommedaach, wo´er ich nassjeschweeßt, obwohl et su fies unk aalt wo´er. Hie´de nächste Tipp fü´alle, die et mit de „Hüh“ hannt. In Hückeswagen jütt et en Kletterpark ( huh in de Bööm) .Da wo´ern ming Männer letztes Jo´ehr uch alt ens. Domo´els hätt de Leo den Kenger Parcour jemeestert. Dis Jo´ehr wo´el äwwer mingen Mann mit do rupp, un de Leo wo´er mutich jenuch, öm mit mingen Mann do bowwen in de Bööm ze klimmen. I´ersch kritt m´r en Jeschirr öm et Liew, do kummen de Stricke draan,dann en Helm up den Kopp, un su kann et loss jonn. En Trainer lüppt ungen mit römm, öm ze saaren, wat ze dunn is. Ich hannt et nit mit de Hüh, su bin ich schön ungen jebliwwen, äwwer uch dat hät m´r jereicht. Ming kleen Jong do bowwen in baal 20m Hüh, Jott joh! Uch mingen Mann wo´er plötzlich janz still un kreeden jruuße Ooren. Wat sall ich saaren, de Leo hätt alles jejowwen, ijendwann ko´en hä äwwer nit mih, is äwwer noch mutich noh ungen jekummen, öm dann in nit janz su jruußer Hüh, wigger ze klimmen. Et dollste wo´er immer am Äng, en Seilrötsche, dat hääd hä noch den janzen Nommedaach wigger machen künnen, äwwer dat jeet jo immer bluus vam bowwen noh ungen. Mingen Mann wo´el et wissen un hätt den janzen Parcour jemaad, wat jlööwt Ihr, wat hä tüscherdurch am küümen wo´er. ( „Wat is dat huh! Ich hann kinn Kraft mih! Jott jo!“) un sujett kreeden ich ungen mit! Am Äng, wie hä dann upp dä letzten Plattform upp dem Boom stund, öm dann mit dä Seilrötsche noch eenmo´el durch de Bööm ze „fleejen“, wo´er hä jlöcklich un fruh, dat hä et jeschafft hätt. En paa Daach haat hä uch noch jet dovan, in Form van Muskelkater. Ich, nassjeschweeß, o´ehn jet ze dunn, hann ming Männer ,ungen, mit „Meinen Baumhelden!“ bejröößt.

Wie alt dückes jeschriwwen, m´r muß nit fott, öm jet upprejendes ze besinn, oder öm et Abenteuer ze sööken- alles dat jütt et uch in de No´ehde! BK