Neuer Sponsor für den König-Palast gesucht

10881451404_9999.jpg

STRÛCKEN, LOTHAR

So, dat häm w’r henger os jebreit, dat alde Jooehr. Be all dä Körmel, dä w’r letzt Jooehr üewerstange häbbe, es noch net ens an dä 21. Dezember de Welt ongerjejange. Dat kuos jooe och jarnet, denn wie jederieene wit, es irsch an dä 30. Mai dä Weltunterjang. Dooe häm w’r noch jet Tiet. Hat Ihr Öch dann op Chressmes joot jestange? Wir wooeren op dän irschde Fierdaag be Angermanns op de Kaffe enjelade. „Wir schenken uns abber jejenseitig nix“, haat Bertha jeseit. Äwer dat hät min Traut net utjehalde. „Mit ohne jarnix in de leeren Hände drin jeh ich aber bei denen nich hin, dat sach ich dich“, seit se.

 

On suo ernst wooer dat die Bertha och jarnet bemint jewäss möt dat nix schenke. Ech kreig en Fläsch Fussel on die Traut en Fläsch 4711. Wat dä Zufall ollde, haden wir akrat dat Selve für die twiee mötjebreit. Die twiee Frollühs minde: „Dat wär abber nich nötig jewesen“, äwer Schäng on ech wooeren tufrieene.

 

Nou wolle w’r ens kieke, wat dat nöie Jooehr os brenge dieet. En Krieewel soll et jooe en de nächste Jooehre richtig schüen werde. Op dän Ostwall kuome twiee nöie Passagen her, die Haltestell an de Rhienstrooet soll nou tatsächlich en de Häng jenooeme werde, op de Neusser Strooet kriejen w’r enne Jlockenplatz, on dä KFC soll en nöi Stadion krieje. Suo joot wie opjestieje en de Regionalliga send die Kicker jooe all.

 

Wenn dann dä Nöibou van de Volksbank en de Höch jetrocke wird, en et Stadtbad op de Neusser Strooet jet Vernönftijes dren eren kömmt, dat Hortenhuus nöi bevölkert wird on op de Friedrichstrooet P&C nöi boue dieet, dann bruk nieemes miehr nach Düsseldorf für entukuope fahre. Bluoß Traut sät ömmer für mech: „Matthes, träum nur weiter, dat erleben wir nich mehr, da ham die jarkein Jeld für“.

 

Velletz hät se jooe Reit. Wenn äwer osser Stadt nou bald en et Altkleider-Jeschäft enjriepe dieet, dann wird Krieewel velletz suo riek, dat w’r dat alles möt lenks betale könne.

 

Wat mech äwer Sorje mäckt, dat es ossere Königpalast. Dat Sponsoring van Köpi löppt jooe an et Eng van et Jooehr av. Dooe mot nou flott jieemes nöies jefonge werde, dä suovüel Flocken locker mäckt, dat die Hall däm sinne Nam krieje dieet. Et Enfachste wöer jooe, die Bölt deje se nou „KönigshofPalast“ düepe. Dat dä Nam nöi wöer, feel bald jarnet op, äwer wir küeße endlich be die Spieele van de Pinguine osser Krieewelsch Bier drenke.

 

Also, Frank Tichelkamp, wuo wards Do noch drop? Velletz werde osser Pinguine jooe Deutscher Meister 2013. En beätere Werbung kann et doch net jeäwe. Dann kües däm Bou natürlich och joot „MeisterHalle“ off „KönigspinguinPalast“ hieete.

 

Wenn osser krieewelsche Brauerei äwer tu jitzig es, hei ech noch en paar angere Vürschläg. Dä Fabel, dä dofür jesorgt hät, dat die Bölt op de Westparkstrooet tu stooehn kooem, hüert jooe bald en de Stadtrooet op. „FabelhaftPalast“ föng ech joot; dat wöer doch en schüen Denkmal für äm. Äwer sieeker hät dä net jenog op Sack für suojet. Dat es be dä Torsten Toeller all janz angersch. Wenn ossere Königpalast demnächst „FressnapfSchuppen“ hieete dej, kann dä dat Sponsern sieeker ut de Portokass betahle. Och „SiemensArena“ kann ech mech joot vürstelle, jenau suo wie „SiempelkampHalle“. Och „VerseidagTempel“ wöer net schleit. Ens kieke, wer van dänne aanbiete dieet. Häb ech et all jeseit? Prost Nöijooehr!

Leserkommentare (13)


() Registrierte Nutzer